Градоначалникот Орце Ѓорѓиевски денеска оствари средба со постојаниот претставник на Програмата за развој на Обединетите нации (УНДП) во земјава Армен Григоријан, на која беа дискутирани повеќе важни теми и беа дефинирани насоките за заедничко дејствување во претстојниот период.
– Во оваа значајна година, во која ќе се потсетиме на солидарноста со која беше обновен главниот град, УНДП ќе организира конференција, на која учествуваат градоначалници од 25-те земји кои му помогнаа на Скопје во 1963. Домаќин ќе им биде токму градоначалникот Ѓорѓиевски.
Воедно, тој побара УНДП да биде патрон на Меѓународниот конкурс за Расадник, кој е прв по земјотресот, а Програмата за развој на Обединетите нации со задоволство прифати да даде стручна поддршка и со адвокатура да го рашири во останатите меѓународни канцеларии, се со цел да се добие поквалитетно решение кое ќе го дефинира идниот лик на Расадник како хумано место за живеење, информира Општина Кисела Вода.
Ѓорѓиевски соопшти дека со Григоријан имал продуктивна средба на која разговарале за теми кои се од исклучителна важност.
– Разговаравме за мое вклучување како градоначалник, но и на ЗЕЛС во поддршка на претстојната конференција која ќе ја организира УНДП по повод одбележување 60 години од разорниот земјотрес во Скопје, на која ќе присуствуваат 25 градоначалници од 25 земји кои во минатото дале поддршка за реконструкција на главниот град. Кисела Вода исто така има своја приказна. Во Драчево и Пржино се уште сведочат автентичните бараки каде што биле сместувани луѓето кои ги изгубиле своите домови, а во рамки на одбележувањето ќе бидам домаќин на градоначалниците кои ќе имаат прилика да ги посетат, изјави Ѓорѓиевски и додаде дека побарал од УНДП да станат патрон на Меѓународниот конкурс за Расадник.
ИЗВОР: skopjeinfo.mk
