Општинските училишта и градинки во Центар ќе донираат 300.000 денари за настраданите од земјотресите во Турција и Сирија по повод Светскиот ден на социјалната правда – 20 февруари.
-Одбележувањето на овој ден се темели на основните принципи за соживот и колективен развој помеѓу народите, а фокусот е насочен кон фер и праведни резултати за секого преку социјалната заштита, правдата и социјалниот дијалог. По тој повод, во рамки на центарските училишта и градинки се организираше хуманитарен настан за собирање парични средства кои ќе бидат донирани за помош на населението во Турција и Сирија, а покрај средствата учениците донираа и детска облека и средства за хигиена, соопшти Општина Центар.
Градоначалникот Горан Герасимовски им се заблагодари на вработените во градинките и училиштата, на родителите и учениците кои, како што вели, несебично се вклучија во оваа хуманитарна мисија.
-По катастрофалниот земјотрес во Скопје во 1963 година, со помош од швајцарската влада е реализиран проектот за изградба на ООУ „Јохан Хајнрих Песталоци“ и оттогаш ова училиште претставува симбол на квалитетно образование, но и симбол на солидарност помеѓу Швајцарија и Република Северна Македонија. Сакам јавно да им се заблагодарам на воспитно-образовниот кадар од сите основни училишта и градинки во Општина Центар, како и на родителите и на учениците кои несебично се вклучија во оваа хуманитарна мисија за помош на Турција и Сирија, изјави Герасимовски
Паричната помош во износ од 300.000 денари ќе биде донирана на посебна сметка на Фондот за солидарност на Црвениот крст на Република Северна Македонија наменета за населението погодено од земјотресите во Турција и Сирија.
ИЗВОР: skopjeinfo.mk
