Градоначалникот на Општина Кисела Вода и претседател на ЗЕЛС, Орце Ѓорѓиевски во 24 анализа рече дека неговите амбиции се да се кандидира за градоначалник на Град Скопје но како што кажа, одлуката ќе биде според анкетите и поддршката на граѓаните.
Тој зборуваше и за вториот повик со кој ќе бидат поддржани капитални инфраструктурни проекти во Општините. Според него ваквиот модел е добар и сите проекти кои ќе бидат одобрени и ќе бидат потпишани договори со ресорните министерства ќе бидат спроведени.
Мојата амбиција е јасно изразена месеци нанзад, рано е до избори, нашата политичка партија почнува со анкетирање и на граѓаните и на членството. Процесот по кој ќе се бира е демократски и секако има и други имиња и соработници кои ги почитувам. На крај кој и да биде избран ќе биде најдобра одлука за Град Скопје“, рече Ѓорѓиевски.
Тој појасни дека моделот и начинот на кој се аплицира на вториот повик со кој ќе бидат поддржани капитални инфраструктурни проекти во Општините е добар и потребни се мали промени.
„Имаше во минатото една теза дали парите ќе стигнат и дали ќе се одобрат проектите па еве стигнаа парите и проектите се одобруваат, конкиретно кај мене можам да набројам дека од 3 проекти два се веќе во реализација и јас не велам дека некаде нема да се случи проблоем и да се пролонгира постапката но штом имаме потпишан договор проектите мора да се реализираат, дали ќе биде за три месеци или година сепак мора да се реализираат“, објасни Ѓорѓиевски.
Според него ваквиот модел на поддршка за Општините бил прифатен и од страна на граѓаните за време на предизборната кампања на ВМРО-ДПМНЕ.
„ВМРО-ДПМНЕ настапија како коалиција со ова ветување и сите го поддржаа, никој никого со сила не го тера да проект кој смета дека е неодржлив да го реализира, не значи дека сите пари до крај треба да се искористат. Моделот не е совршен и треба да се размисли за надоградување и измени, но суштински мислам дека е добар“, додаде Ѓорѓиевски.
Извор: 24vesti.mk
