Групата во која бил и градоначалникот на Стар Град во Сараево била разоткриена благодарение на дешифрирањето на апликацијата „Скај“, која се користела за комуникација меѓу криминалците. Податоците за овој случај БиХ ги добила од Европол
Полицијата по налог на обвинителството во Босна и Херцеговина го уапси Ибрахим Хаџибајриќ, градоначалникот на општина Стар Град во Сараево и уште шест лица за корупција и криминал, а беа разоткриени бидејќи ја користеле апликацијата „Скај“ за комуникација, чие дешифрирање придонело за решавање злосторствата низ цела Европа.
По вчерашниот претрес во повеќе згради, сараевската полиција го привела градоначалникот Хаџибајриќ заедно со неговиот син Сеид, општинскиот секретар Алма Дестановиќ, претприемачот Елмедин Каришиќ и уште четири лица бидејќи обвинителството ги товари за организиран криминал, злоупотреба на позиција или овластување, перење пари и примање и давање мито.
Според соопштението на обвинителството во Сараево, постои сомневање дека од 2019 година до мај 2023 година Хаџибајриќ и Каришиќ организирале и раководеле со криминална група. Некои нејзини членови комуницирале меѓу себе преку инсталираната апликација „Скај“ за да си ги покријат трагите и да договараат извршување кривични дела.
Европол ги открил
Според обвинителството, градоначалникот на општина Стар Град во Сараево, Ибрахим Хаџибајриќ, кој е и потпретседател на партијата Народна Европска Унија (НЕС), примил поткуп во износ од 75 000 евра само за доделување недвижен имот на територијата на таа општина. Осомничените се товарат и за незаконско издавање паркинг-места за најмалку три фирми кои истовремено ги контролирале и на тој начин незаконски заработиле стотици илјади марки.
По кривичната истрага на полицијата, уапсените во текот на денот ќе бидат предадени на окружното обвинителство во Сараево.
При претрес на општинската зграда и други објекти што ги користеле пријавените, пронајдени и одземени се документи, електронски уреди за чување податоци, пари и накит, како и многубројни други предмети, соопшти полицијата.
Групата во која бил и градоначалникот на Стар Град била разоткриена благодарение на дешифрирањето на апликацијата Скај, која се користела за комуникација меѓу криминалците. Податоците за овој случај БиХ ги добила од Европол.
Поранешниот министер за безбедност на БиХ и лидер на партијата Алијанса за подобра иднина, Фахрудин Радончиќ, најави дека со помош на податоците од оваа комуникациска апликација ќе бидат отстранети многубројните спонзори на тежок криминал.
„Благодарение на апликацијата ‘Скај’, на подрачјето на регионот се открива дека зад наркокартелите практично стојат полициско-разузнавачки, судски и политички лидери. ‘Скај’ ќе ја исчисти Босна и Херцеговина од многу политичари, а дел од полициската структура веќе падна“,
рече Радончиќ за државната радио и телевизија на Босна и Херцеговина БХРТ.
Фото: Илустрација/EPA-EFE/FEHIM DEMIR
Извор: 360stepeni.mk
