Виктор Монталијани, кој се споменуваше како еден од најсериозните потенцијални противкандидати на Џани Инфантино за претседателската функција во ФИФА, најверојатно нема да влезе во трката на изборниот конгрес закажан за 18 март. Според информациите на „ЕСПН“, Канаѓанецот е повеќе насочен кон добивање нов мандат на чело на КОНКАКАФ.
Монталијани ја предводи фудбалската конфедерација што ги обединува националните федерации од Северна и Централна Америка и од Карибите. Во последните месеци неговото име сè почесто се споменуваше како можна опција за обединување на дел од противниците на актуелниот претседател на ФИФА.
Сепак, уште на почетокот на октомври се појавија информации дека канадскиот функционер сериозно размислува дали да се впушти во директна битка со Инфантино. Сега се чини дека неговите дилеми би можеле да завршат со одлука да не се кандидира.
Евентуалното повлекување на Монталијани од трката би било значајна предност за Инфантино, кој активно ја обезбедува поддршката од националните федерации. Од друга страна, неговите противници засега не успеваат да се обединат околу една силна кандидатура што би можела посериозно да му се закани.
Во такви околности, шансите Инфантино да добие нов четиригодишен мандат изгледаат сè поголеми.
Како можна алтернатива се споменува и претседателот на Азиската фудбалска конфедерација, шеикот Салман бин Ибрахим Ал Калифа, кој веќе му беше противкандидат на Инфантино на изборите во 2016 година.
Според сценариото што се разгледува, тој би можел да обезбеди значителна поддршка од азиските федерации, а потоа да се обиде да привлече гласови и од Европа, КОНКАКАФ, како и од делови на Африка и Океанија. Сепак, оваа опција наидува на отпор и во самата азиска конфедерација, поради што засега останува неизвесна.
Во моментов, единствениот што јавно ја најавил намерата да се кандидира против Инфантино е поранешниот швајцарски репрезентативец Рамон Вега. Неговата кандидатура, сепак, засега не се смета за сериозна закана за актуелниот претседател.
Изборниот конгрес на ФИФА ќе се одржи на 18 март во Рабат, Мароко. До тогаш главната неизвесност останува дали противниците на Инфантино ќе успеат да најдат кандидат околу кого ќе се обединат и кој ќе може да му се спротивстави во борбата за претседателската функција.
Извор: sportmanija.mk
