Среќен сум што имам можност да зборувам за интерпелација за да објаснам некои работи што во јавноста беа искажани, истакна претседателот на Собранието, Африм Гаши во интервју за ТВ Сител во пресрет на утрешната интерпелација.
Според него, ова е одраз на демократија и демократските процеси во една една држава.
-Убаво е да имаме различни мислења, тоа е суштината на демократијата. Би било лошо да има едноумие и тој систем сме го поминале. Многу сум среќен што утре ќе имам шанса да одговорам пред јавноста за се што беше засегната и заинтересирана, рече тој.
Гаши потенцира дека неговата совест е мирна и чиста и со ништо не придонел за да се предизвика проблем.
-Имам мирна и чиста совест дека со ништо не сум предизвикал хистерија во јавноста. Самата интерпелација не се однесува за нешто што е принципиелно прекршено во Собранието, или да е скратено правото на некој пратеник или пратеничка група, туку повеќе станува збор за тривијални теми кои добиваат на знаење во социјалните медиуми. Но подготвен сум и за тоа да разговарам. На најдостоинствен начин ја работам својата работа. Најчесно и најодговорно. Утре пратениците ќе го кажат своето мислење, а јас сум подготвен на секаков одговор и секаква одлука што ќе ја донесе нашето Собрание да ја почитувам, рече Гаши.
Тој ги повика сите пратеници и од опозицијата и од својата партија утре да гласаат индивидуално според своето лично убедување.
-Јас оваа интерпелација не ја гледам од политички аспект, туку индивидуално од секој пратеник. И би го поканил секој пратеник да гласа според своето лично убедување. Ги молам и пратениците од мојата коалиција Вреди, да гласаат на таков начин. Треба да се научиме така да одговараме пред јавноста. Интерпелацијата е една многу демократска алатка што овозможува да дадеме отчет и пред пратениците и пред граѓаните и треба да се научиме на тоа. И утре ќе излезам со свој одговор пред јавноста и пратениците и верувам дека сите ќе гласаат според своето убедување и според својата чиста совест. За оваа интерпелација им се заблагодарувам и на Левица за дадената можност да ги изнесам своите аргументи, позади кои стојам и денес, дополни спикерот Гаши.
ИЗВОР: kurir.mk
