Ваквото уверување директорот на Институтот за сеизмички отпорни градби и климатски промени Михаил Гаревски го темели на законот од 2014 година, според кој, како што вели, секој објект мора да помине низ Институтот за земјотресно инженерство
Разорниот земјотрес што денеска ја погоди Турција не би требало да ги става во мисла граѓаните во земјава во врска со квалитетот и издржливоста на градбите кои ги имаме кај нас, бидејќи според директорот на Институтот за сеизмички отпорни градби и климатски промени, Михаил Гаревски, градбите во државава од 2000 година наваму, особено оние од 2014 година досега, се едни од најсигурните градби во Европа.
Ваквото уверување Гаревски го темели врз основа на законот од 2014 година, според кој, како што вели, секој објект мора да помине низ Институтот за земјотресно инженерство.
Додава дека доколку објектот е поголем од 300 квадрати, покрај надзор на проектот, треба и теренски да се направи проверка на самата конструкција, за да се утврди дали се постапува како што треба.
„Јас правев една анкета преку Институтот и сакав да видам дали скопјани се уште го памтат земјотресот од 1963 година. Имав едно прашање – на кои градби најмногу им верувате. Тие им веруваат најмногу на градбите од 1964 до 1970 година, што воошто не е точно. Градбите, да речеме, од 2000 година наваму, особено од 2014 досега, се едни од најсигурните градби, можам да кажам и во Европа“,
вели Гаревски во гостувањето во „Тема на денот“ на ТВ Сител.
Коментирајќи ја информацијата од Американскиот геолошки институт, според која, градбите кои беа урнати од денешниот земјотрес во Турција биле од неармирани тули, Гаревски вели дека таквата градба не е секогаш главниот фактор за разорноста на земјотресот, туку магнитудата игра најголема улога.
Прашан дали во Скопје или во други градови од земјава има останато вакви градби од тули, Гаревски посочи дека такви градби се останати од периодот пред катастрофалниот земјотрес кој го погоди главниот град во 1963 година.
Сепак, додава тој, по 1964 година практично никој не гради со масивни ѕидови од тула.
Денеска, во временски интервал помал од 12 часа, во Турција се случија два потреси со разорна магнитуда. Првиот земјотрес се случи во текот на ноќта додека луѓето спиеја, а беше со магнитуда од 7,8 Рихтерови степени, што го прави еден од најсилните земјотреси во регионот во изминатиот еден век. Вториот, со магнитуда од 7,7 степени според Рихтеровата скала, се случи во 13:24 часот по локално време.
Вкупниот биланс на жртви во земјотресот во Турција и во Сирија, чиј северозападен дел исто така се соочува со сериозен број на загинати од потресот во соседната земја, сега изнесува повеќе од 2.300 луѓе.
ИЗВОР: 360stepeni.mk
