ИСТАНБУЛ (АА) – Турскиот претседател Реџеп Таип Ердоган им се заблагодари на гласачите во странство што излегоа на изборите на 14 мај и ги покани да излезат на гласање во вториот круг од претседателските избори на 28 мај, јавува Анадолу.
Ердоган на својот профил на Твитер им прати порака на турските гласачи што живеат во странство.
„Почитувани наши граѓани што живеете во странство, успешно го завршивме првиот круг од изборите во кој излеговте на гласање во рекорден број“, рече Ердоган, додавајќи дека многу гласачи во странство гласале за него и за Народна алијанса.
„Не им подлегнавте на обидите на членовите на терористичката организација да ве заплашат и да извршат притисок, дополнително ја зајакнавте демократијата во Туркије, нѐ направивте сите горди“, рече тој.
Тој изрази длабока благодарност до гласачите во странство за чесниот и демократски став што го покажале.
„Сега пред нас е вториот круг од претседателските избори. Утре (сабота, 20 мај) започнува гласањето во странство и на граничните премини. Барам од вас да го искористите вашето демократско право и се надевам дека од овој тест ќе излеземе со чиста совест“, додаде Ердоган.
Народна алијанса на Ердоган предводена од владејачката Партија за правда и развојот (АК Партија) освои мнозинство во Парламентот.
На претседателските избори ниту еден кандидат не освои мнозинство гласови, па така во новата изборна трка на 28 мај ќе бидат актуелниот турски претседател Реџеп Таип Ердоган, кој во првиот круг освои 49,5 отсто од гласовите и лидерот на турската опозиција Кемал Киличдароглу, кој во првиот круг доби 44,89 отсто од гласовите.
Одѕивот на гласачите на изборите во земјата беше 88,92 отсто, а на турските државјани во странство 52,69 отсто.
Извор: www.aa.com.tr
