ИСТАНБУЛ (АА) – Не постои друга војна каде што жените и децата биле директно цел на напади како во тековниот геноцид во Газа, изјави денес турскиот претседател Реџеп Таип Ердоган, јавува Анадолу.
„Во последните 13 месеци, повеќе од две третини од над 50.000 невини луѓе убиени во Газа се жени и деца“, рече Ердоган во обраќањето на Меѓународниот самит за жени и правда во турскиот град Истанбул.
„Жените на Палестина, хероини кои под бомбите ги штитат своите деца, семејства, домови и праведната борба, се џиновски споменици на гордоста за целиот муслимански свет“, истакна Ердоган.
Тој додаде дека Анкара ќе продолжи да стои покрај своите „браќа и сестри“ во Појасот Газа и Либан, кои се под израелски напади, додека масакрите не престанат и додека не се воспостави прекин на огнот и мир.
Турскиот претседател рече дека искрено верува дека Доналд Трамп, кој оваа недела доби втор мандат за Белата куќа по четиригодишна пауза, ќе ги преземе „неопходните чекори за ставање крај на војните“, изразувајќи надеж дека тоа ќе се случи.
Извор: Anadolu Agency (AA)
