ХАТАЈ (АА) – Двегодишно девојче е спасено од урнатините на зграда во градот Антакиjа, во турската областа Хатај, дури 122 часа по разорните земјотреси што во понеделникот ги потресоа јужните подрачја на Туркије, известува Анадолу.
Спасувачките екипи во трка со времето ги продолжуваат акциите за претрага и спасување во регионите погодени од земјотресите.
Припадниците на спасувачката единица од турскиот град Мугла утрово слушнаа гласови под урнатините во улицата Ѓунеш во Антакија и веднаш започнале со акцијата за спасување.
Вложувајќи големи напори, од урнатините е спасено двегодишното девојче Асја, кое потоа со возило на итната помош е префрлено во болница.
Најмалку 20.665 лица загинаа, а 80.088 се спасени по двата силни земјотреси што во понеделникот ги потресоа јужните делови на Туркије.
АФАД информираше дека по двата разорни земјотреси со епицентри во турската област Кахраманмараш забележани се 1.666 последователни земјотреси.
Од подрачјето погодено од земјотресите во други делови на Туркије се евакуирани 86.754 лица.
– Разорните земјотреси што ја потресоа Туркије на 6 февруари
Два силни земјотреси, првиот со интензитет од 7,7 степени по Рихтер, во понеделникот наутро во 4:17 часот по локално време, со епицентар во округот Пазарџик, и вториот во 13:24 часот, со интензитет од 7,6 степени по Рихтер, со епицентар во местото Елбистан, ги потресоа јужните делови на Туркије. Епицентрите на земјотресите се регистрирани во турската област Кахраманмараш.
Бројни спасувачки екипи и понатаму посветено работат во акциите за претрага и спасување на луѓето заробени под урнатините на зградите.
Во земјотресите што силно ги потресоа и северните делови на Сирија, животот го загубија најмалку 3.300 лица, а над 5.000 се повредени.
Извор: www.aa.com.tr
