ТЕЛ АВИВ (АА) – Низ Израел се одржуваат масовни протести во рамките на „денот на граѓанска непослушност“ против реформата на законот со кој Владата на премиерот Бенјамин Нетанјаху ги ограничува овластувањата на правосудството, јавува Анадолу.
Власта продолжува чекор по чекор контроверзната правосудна реформа да помине низ Парламентот, а противниците на оваа реформа ја сметаат за мешање во судството и веќе 12 недели организираат протести.
Демонстрантите и денес излегоа на улиците и плоштадите низ Израел, а најголеми собири беа организирани во Тел Авив, каде што маршираа низ улиците и со израелски знамиња го извикуваа слоганот „демократија“.
Израелската полиција ги блокираше патиштата што водат до жариштата на демонстрациите.
Некои демонстранти, вклучително и група резервисти, ги покажаа израелското знаме и таканаречената израелска декларација за независност напишана на голем транспарент на ѕидовите на Стариот Град во окупираниот Источен Ерусалим.
Израелските медиуми јавуваат дека демонстрантите блокирале голем број улици и фреквентни раскрсници во повеќе градови во земјата.
Весникот „Хаарец“ пренесува дека во протестите се вклучиле и стотици вработени во индустриската компанија „Рафаел“, кои се собрале во комплексот.
Вработените во компанијата, која ги произведува и израелските системи за противвоздушна одбрана (Челична купола), не сакаа да зборуваат со медиумите, туку истакнаа транспаренти со пораки „Без демократија нема безбедност“ и „Ние сме челична купола на Израел“.
Извор: www.aa.com.tr
