АНКАРА (АА) – Новиот состав на турскиот Парламент денес ја започна својата прва пленарна седница, по три дена откако Врховната изборна комисија на земјата ги објави конечните официјални резултати од парламентарните избори одржани на 14 мај, јавува Анадолу.
Лидерот на Партијата за национално движење (МХП), Девлет Бахчели, како најстар пратеник во Парламентот (75), претседаваше со Собранието како вршител на должноста претседател. Тој ќе ја извршува функцијата додека не се избере нов спикер.
Пратениците на традиционалната церемонија положуваат заклетва, на којашто присуствува и турскиот претседател Реџеп Таип Ердоган.
На изборите на 14 мај, Партијата за правда и развој (АК Партија) на Ердоган се појави како партија со освоени најголем број мандати во Парламентот, односно вкупно 268 места.
Покрај АК партијата, нејзините партнери од Народната алијанса, Партијата за национално движење (МХП), освои 50 места, додека партијата Нова благосостојба (ЈРП) освои пет, обезбедувајќи комбинирано мнозинство од 323 места од вкупно 600-члениот Парламент.
Со 169 пратеници, Републиканската народна партија (ЏХП), заедно со нејзиниот коалициски партнер Партијата ИЈИ (IYI), обезбедија вкупно 212 места во Парламентот, претставувајќи ја главната опозициска Национална алијанса.
Останатите 65 места во Парламентот ги освои Алијансата за труд и слобода, составена од Партијата на Зелената левица со 61 место и Работничката партија на Туркије со четири пратенички места.
Извор: www.aa.com.tr
