ГАЗИАНТЕП (АА) – Четиригодишно девојче спасено е од урнатините на турскиот град Газиантеп, дури 132 часа по разорните земјотреси што во понеделникот ги погодија јужните области на Туркије, известува Анадолу.
Спасувачките екипи во трка со времето ја продолжуваат претрагата и спасувањето во регионите погодени од земјотресите.
Припадниците на спасувачките тимови во местото Ислахије слушнале гласови од урнатините и по акцијата во која вложија големи напори, успеаја да го спасат четиригодишното девојче Шенѓул, кое се здобило со повреди во земјотресот.
Акцијата за спасување траела околу 12 часа.
Во земјотресите на југот од Туркије загинаа 21.043, а спасени се 80.097 повредени, соопшти денес претседателот на Туркије, Реџеп Таип Ердоган.
Два разорни земјотреси, првиот со интензитет од 7,7 степени по Рихтер, во понеделникот наутро во 4:17 часот по локално време, со епицентар во округот Пазарџик, и вториот во 13:24 часот, со интензитет од 7,6 степени по Рихтер, со епицентар во местото Елбистан, ги потресоа јужните делови на Туркије. Епицентрите на земјотресите се регистрирани во турската област Кахраманмараш.
Бројни спасувачки екипи и понатаму посветено работат во акциите за претрага и спасување на луѓето заробени под урнатините на зградите.
Во земјотресите што силно ги потресоа и северните делови на Сирија, животот го загубија најмалку 3.300 лица, а над 5.000 се повредени.
Извор: www.aa.com.tr
