АНКАРА (АА) – Туркије нема да ја ратификува кандидатурата на Шведска за членство во НАТО доколку оваа земја не ги исполни обврските од трипартитниот меморандум, изјави министерот за надворешни работи на земјата, Мевлут Чавушоглу, јавува Агенција Анадолија (АА).
„Доколку еден ден Шведска ги исполни своите обврски, тогаш ќе седнеме и ќе видиме. Но, во моментов не е можно да кажеме ‘да’ на кандидатурата на Шведска за НАТО под овие услови“, рече Чавушоглу на заедничката прес-конференција со неговиот унгарски колега Петер Сијарто во Будимпешта.
„Туркије го одложи следниот трипартитен состанок закажан за февруари во Брисел со Шведска и Финска за нивните кандидатури за НАТО“, рече Чавушоглу, „бидејќи сè треба да биде транспарентно“.
Екстремно десничарскиот данско-шведски политичар Расмус Палудан во петокот запали примерок од Куранот, светата книга на исламот, пред џамија во Данска.
Исламофобичниот чин се случи по неколку дена откако Палудан запали примерок од Куранот пред турската Амбасада во Шведска за време на протест одобрен од полицијата.
Сијарто, исто така, го критикуваше нападот врз Куранот, велејќи: „Како христијанин, како побожен католички христијанин, палењето и навредувањето на светата книга на друга вера на никој начин не е прифатливо.“
„Жал ми е, но тоа што палењето на светата книга на друга вера се нарекува слобода на говор е глупост“, додаде тој.
Палудан најави и дека ќе пали по еден примерок од муслиманската света книга секој петок додека Шведска не биде вклучена во НАТО-алијансата.
Шведска и Финска официјално поднесоа барање за влез во НАТО во мај минатата година, одлука поттикната од руската војна против Украина, која започна на 24 февруари 2022 година.
Во рамките на меморандумот потпишан минатиот јуни меѓу Туркије, Шведска и Финска, двете нордиски земји ветија дека ќе преземат чекори против терористите за да добијат членство во НАТО-алијансата.
Во договорот, Шведска и Финска се согласија да не даваат поддршка на терористичките организации како што се ПКК и нејзините ограноци и ФЕТО, и меѓу другото да ги екстрадираат осомничените за тероризам во Туркије.
Едногласна согласност од сите членки на НАТО – вклучително и Туркије, која е членка повеќе од 70 години, е потребна за сите нови членки да бидат примени во Алијансата.
Туркије вели дека земјите, особено Шведска, треба да направат повеќе, особено по провокативните терористички демонстрации и палењето на примероци на светиот Куран во Стокхолм.
Извор: www.aa.com.tr
