АНКАРА (АА) – Туркије и Израел ќе продолжат со напорите за развој на соработката, изјави денес турскиот министер за надворешни работи, Мевлут Чавушоглу, јавува Анадолу.
На заедничката прес-конференција со неговиот израелски колега Ели Коен во Анкара, Чавушоглу се заблагодари на Израел за поддршката пружена по разорниот земјотрес во Туркије и ја истакна неговата значајна помош во напорите за потрага и спасување во Кахраманмараш.
„Израел е една од првите земји што испрати поддршка за Туркије“, рече Чавушоглу, додавајќи дека израелските екипи за потрага и спасување, како и медицински тимови, веднаш дошле во јужните региони на Туркије погодени од земјотресот.
Истакнувајќи дека израелските тимови се едни од најбројните на теренот, турскиот министер рече дека израелските спасувачи дале „многу сериозна поддршка“ за напорите во Кахраманмараш, извлекувајќи 19 луѓе од урнатините.
Од своја страна, израелскиот министер Коен изрази солидарност и сочувство со Туркије и турскиот народ „во овие тешки времиња“ и рече дека Израел ќе направи сè што може за да обезбеди помош и да ги утеши оние на кои им е потребна помошта.
Коен ги нарече силните земјотреси во јужна Туркије „трагичен настан без преседан“.
„Ќе продолжиме да ги зајакнуваме нашите односи во деновите и месеците што следат. Ќе ги развиваме и унапредуваме нашите билатерални односи на различни полиња“, додаде тој.
Два силни земјотреси на 6 февруари ја погодија јужна Туркије.
Потресите со јачина од 7,6 и 7,7 предизвикаа човечки и материјални загуби и во северна Сирија.
Според последните официјални податоци, во Туркије загинаа над 31.600 луѓе, додека во Сирија бројот на загинати надмина 3.650.
Извор: www.aa.com.tr
