САД направија уште еден значаен чекор во борбата против корупцијата со тоа што ги назначија поранешниот заменик-претседател на Владата, Артан Груби и судијата на Апелациониот суд, Енвер Беџети за вмешаност во значајна корупција. Поради нивните напори да се мешаат и да го нарушат функционирањето на судството, со оваа одлука, тие и нивните непосредни членови на семејствата добиваат забрана за влез во САД.
Ова го изјави амбасадорката на САД во земјава, Ангела Агелер, на денешната прес-конференција во врска со новите лица од Северна Македонија кои се најдоа на американската таканаречена „црна листа“ – Груби и Беџети.
Тие што го поткопуваат владеењето на правото за лична корист и на сметка на народот, треба да разберат дека корупцијата носи последици, изјави Агелер.
„Дополнителни санкции исто така се разгледуваат во Вашингтон. Се надевам дека оваа акција јасно покажува дека САД можат и ќе ги искористат сите алатки на располагање за да ги повикаат на одговорност оние чии криминални активности ја поткопуваат безбедноста, стабилноста и вредностите на владеењето во Северна Македонија“, рече Агелер.
Амбасадорката на САД во земјава изрази надеж дека судските и правосудните структури во Северна Македонија ќе ги повикаат корумпираните актери на одговорност.
Одби да ги коментира деталите за назначувањето на Груби и Беџети на „црната листа“, но рече дека САД имаат цврсти докази за нивна вмешаност во корупција.
„Доказите што Вашингтон ги разгледуваше, што ги собравме и тука во оваа земја и во Вашингтон, беа лесно достапни…Ако ние можеме да ги собереме тие докази, тогаш можат и тие [македонските институции]“, рече Агелер.
Американската амбасадорка Агелер кажа дека синоќа и утрово разговарале со премиерот Христијан Мицкоски за новите назначувања на листата.
На новинарско прашање за коментарите на Мицкоски дека домашни политички актери подготвуваат дестабилизација на државата, Агелер рече дека не сака да верува оти некој е способен да ја дестабилизира сопствената држава.
Во врска со „црната листа“, амбасадорката на САД кажа дека истата не е затворена и дека очекува на неа да се најдат и други имиња.
Извор: Мета.мк
ИЗВОР: racin.mk
