АНКАРА (АА) – Ерменија ѝ подаде рака на пријателство на Туркије по минатонеделните земјотреси кои досега ги одзедоа животите на речиси 35.420 лица во земјата, изјави денеска турскиот министер за надворешни работи, Мевлут Чавушоглу, јавува Анадолу.
„Ерменија подаде рака на пријателство во ова тешко време и покажа солидарност и соработка“, рече Чавушоглу на прес-конференцијата со неговиот ерменски колега Арарат Мирзојан во главниот град Анкара.
Чавушоглу рече дека посетата на Мирзојан на Туркије е значајна.
Два разорни земјотреси со јачина од 7,7 и 7,6 степени според Рихтеровата скала на 6 февруари ги погодија јужните делови на Туркије, со епицентар во областа Кахраманмараш, а голем број спасувачки тимови сè уште ревносно работат на пребарување и спасување на луѓето затрупани во урнатините на зградите.
Земјотресите со јачина од 7,7 и 7,6 степени, со епицентар во областа Кахраманмараш, погодија над 13 милиони луѓе во десет области, Хатај, Кахраманмараш, Газиантеп, Адана, Адијаман, Дијарбакир, Килис, Малатија, Османије и Шанлиурфа.
Неколку земји во регионот, од кои најкатастрофално Сирија, ги почувствуваа силните потреси.
Истакнувајќи дека Ерменија испратила тим од 28 лица за пребарување и спасување во Туркије по земјотресите, Чавушоглу рече дека нивните напори во Адијаман трајат од 8 февруари.
„Тие испратија 100 тони хуманитарна помош и рекоа дека ќе испратат дополнителна помош“, додаде тој.
Мирзојан, од своја страна, ја изрази подготвеноста на Ерменија во градењето мир во овие тешки времиња.
Ерменскиот министер се очекува подоцна да го посети Адијаман, каде што ерменскиот тим продолжува да работи на пребарување и спасување.
Извор: www.aa.com.tr
