ИСТАНБУЛ (АА) – Франција денес започна операција од големи размери со повеќе од 600 припадници на жандармеријата во Нова Каледонија, колонија оддалечена 17.000 километри од територијалните граници на Франција, за да ги сузбие инцидентите што ги започна локалното население како одговор на давањето избирачко право на државјаните на Франција, известува Анадолу.
„Операцијата вклучува околу 600 припадници на жандармеријата“, објави францускиот министер за внатрешни работи Жерард Дарманин на социјалната мрежа Х.
Тој истакна дека цел на операцијата е повторно воспоставување на ред и враќање на контролата над главните патишта во должина од 60 километри меѓу Нумеја, главниот град на Нова Каледонија и аеродромот.
„Со помош на националната жандармерија и полицијата, отстранети се околу 60 барикади на патиштата“, соопшти Високата комисија на Републиката во Нова Каледонија.
„Повеќе од 200 луѓе се приведени, а 20 продавници за храна повторно се отворени во регионот“, изјави Дарманин.
Министерот за внатрешни работи додаде дека Владата на Франција знае дека има уште многу барикади што треба да се остранат и им издала наредба на единиците за спроведување на законот.
Најмалку 6 лица се убиени во нередите, а стотици се приведени од понеделникот досега.
Немирите настанаа како реакција на оценката за уставноста на одлуката што за Нова Каледонија ја започна Дарманин. Доколку законските измени бидат усвоени, на секој француски државјанин што непрекинато престојувал во Нова Каледонија последните 10 години би му било дозволено да гласа на локалните избори. Локалното население стравува дека таквите законски измени би ги „разводниле“ гласовите на автохтоното население.
Претседателот на Франција, Емануел Макрон, во средата прогласи вонредна состојба на архипелагот и распореди воен персонал во регионот.
Извор: Anadolu Agency (AA)
