Големото проширување на ЕУ од 2004та – убава европска приказна или најава за 2030та? Утре се заокружуваат две децении од големото отворање на европската врата, а Македонија и земјите од регионот се уште го одат трнливиот пат кон поголема ЕУ.
Германскиот претседател Штајнмаер во говор од Прага, објавен на неговата официјална страна, порача дека Западен Балкан не смее да чека и да стане сива зона за руско влијание.
– Сега, 20 години по најголемото проширување на нашата унија, повторно сме во историска ситуација во која мораме да направиме се што можеме за да ја обезбедиме нашата цел за мирен соживот во слобода и демократија. Уште еднаш, десет држави се во процес на пристапување во исто време. Тие се на пат. И едно е јасно: бидејќи Путин ќе го задржи своето деструктивно влијание каде и да може, Западен Балкан не може да остане во геополитичка сива зона, рече Франк-Валтер Штајнмајер, претседател на Германија.
А на конференција во Чешка, пораки дека проширувањето во овој момент е геополитичка неопходност испратија голем број еу политичари.
– Имам разбирање за земјите кои стојат пред вратата на ЕУ, нивните амбиции ја докажуваат привлечноста на тој проект. Проширувањето е исто така геополитичка неопходност. Ако ги оставиме Западен Балкан, Украина и Молдавија да стојат пред вратата на ЕУ, ќе ги оставиме на милост и немилост на Русија и на актерите кои не и посакуваат добро на Европа, вели чешкиот претседател Петр Павел.
На масата во Брисел,пак, шефовите на дипломатии на ЕУ денеска ги отворија темите за ново проширување, но и за користењето на ветото од земјите членки.
– Ја подготвуваме иднината, па затоа сум убедена дека ни треба повеќе квалификувано мнозинство, кога станува збор за одбранбените политики, а исто така и за надворешните политики, вели Хаџа Лахбиб од МНР на Белгија.
Вера Јурова потпретседателка на Европската комисија за вредност и транспарентност – Прашавте за недостатоците, се разбира, помалите и земјите со средна големина, секогаш ќе бидат многу будни, затоа што ветото е единствениот инструмент што го имаат во рака, кога е нешто драматично против нивните национални интереси.
На 1 мај 2004та ЕУ прими 10 нови членки . Естонија, Латвија, Литванија, Полска, Унгарија, Чешка, Словачка, Кипар, Малта и Словенија. Настанот се нарекуваше „Биг Бенг“. А прашањето кое сега се поставува е – дали ЕУ ќе ги отвори вратите за новото „Големо враќање дома“ или само се спрема за европски избори во јуни.
Извор: 24vesti.mk
