„Вања била таргетирана жртва“ – цела Македонија ја чека екстрадицијата на Палевски од Турција

Киднапирањето на Вања Ѓорчевска било планирано но треба да се разјасни кои биле плановите на киднаперите, вели професорката Светлана Николоска од Факултетот за безбедност во Скопје. Во Клик Плус таа рече дека обдукцијата треба да покаже дали врз Вања е употребено физичко насилство и дали таа има повреди или скршеници.

Според професорката Николоска, многу е важно како постапувала полицијата кога ја примила пријавата за исчезнувањето. Важни, според професорката се информациите дали тие имале проблеми како семејство или пак дали самото девојче имало проблеми, со цел да се потврди дали станува збор за намерно исчезнување на девојчето или станува збор за киднапирање. Исто така важно е што изјавила мајката во полиција, вели Николоска.

Министерството за правда и Обвинителството во текот на вчерашниот ден на турски јазик го превеле и официјално го испратиле барањето за екстрадиција на првоосомничениот Љупчо Палевски кој е фатен во Баликесир во Турција. Министерот за правда Кренар Лога очекува Турција да одговори што е можно побрзо.

Од друга страна, Обвинителството освен за првоосомничениот, истрага покрена и за Стефан Димковски, лицето кое го возело Палевски од Белград до Турција. Тој се товари за помагање на сторителот на кривичното дело. Обвинителството за сега одлучи за адвокатот на Палевски да не бара никаква мерка за претпазливост бидејќи, како што велат, нема правна основа.

„Основното јавно обвинителство Скопје донесе Наредба за спроведување истражна постапка за едно лице поради основано сомнение дека сторил кривично дело – Помагање на сторител по извршено кривично дело од член 365 став 3 вв став 1 од Кривичниот законик. Надлежниот јавен обвинител до судијата на претходна постапка од Основниот кривичен суд Скопје достави предлог за определување мерка притвор за осомниченото лице“.

Инаку на 5 декември во Баликесир, Турција, Љупчо Палевски беше фатен од полицијата додека одел пеш по автопат. Тој фатил такси божем оди за Истанбул, со цел за да му се изгубат трагите, но потоа се обидел да се врати во Баликесир. Казната за делата за кои се сомничи може да биде и доживотен затвор.