Според српското МВР, на првиот ден од кампањата за предавање на нелегалното оружје, биле предадени 1 500 парчиња оружје, 500 куршуми, повеќе од 100 бомби, минофрлачи и друго оружје
Претседателот на Србија, Александар Вучиќ, изјави дека во акцијата на Министерството за внатрешни работи за предавање на нелегалното оружје се предадени повеќе од 3 000 оружје и десетина илјади куршуми.
„Тоа е добра вест. Знаев дека многу луѓе ќе се налутат поради оваа акција, но тоа е важно за Србија… Ќе продолжиме да земаме нелегално оружје, а потоа ќе анализираме се што е легално“,
рече Вучиќ.
Тој изјави дека има големо присуство на полицајци во училиштата и дека реакциите на родителите и наставниците се позитивни.
„Наставниците сега ќе имаат поголеми права… Децата нема да можат да се однесуваат арогантно и силеџиски“,
рече Вучиќ, кој најави итно вработување нови полицајци.
Според српското МВР, на првиот ден од кампањата за предавање на нелегалното оружје, биле предадени 1 500 парчиња оружје, 500 куршуми, повеќе од 100 бомби, минофрлачи и друго оружје.
Граѓаните на Србија во следните месец дена ќе можат без санкции да го предадат нерегистрираното оружје во најблиската полициска станица. Во тој период граѓаните кои ќе го предадат нерегистрираното оружје нема да одговараат ниту кривично ниту ќе сносат некакви последици и не мора да го докажуваат потеклото на оружјето.
Српското Министерство за внатрешни работи ја покрена акцијата за предавање на нелегалното оружје по двете масовни убиства што се случија белградското основно училиште „Владислав Рибникар“ и во селата кај Младеновац и Смедерево. Во два масакри беа убиени 17 лица, а над 20 беа ранети.
Полициски патроли ќе бидат распоредени во близина на секое училиште во Србија, а засилено полициско присуство ќе има на сите јавни места каде што се собираат поголем број луѓе. Ова е исто така една од мерките што ги најавија српските власти по двата крвави масакри. Видливо полициско присуство ќе има во трговските центри, парковите и на плоштадите, најави викендов државниот секретар на српското МВР, Данило Стевандиќ, во гостување на ТВ Пинк.
Извор: 360stepeni.mk
