Јапонскиот премиер ја посети Буча

Кишида е првиот шеф на јапонска влада по Втората светска војна кој посетил воена зона. Неговата посета се совпаѓа со престојот на кинескиот претседател Си Ѓинпинг во Москва

Јапонскиот премиер Фумио Кишида во рамки на својата историска посета на Украина денеска го посети Буча, гратчето недалеку од Киев, кое стана симбол на злосторствата на руската окупација.

Кишида пристигна во Буча со воз рано попладне, веднаш по пристигнувањето во Киев, а пред средбата со претседателот Володимир Зеленски. Киев смета дека неговото доаѓање во земјата за време на војната е историско. Кишида е единствениот лидер на земја од групата Г7 кој досега не бил во Киев.

„Оваа историска посета е знак на солидарност и силна соработка меѓу Украина и Јапонија. Благодарни сме на Јапонија за нејзината силна поддршка и придонес за нашата идна победа“,
напиша заменик-министерката за надворешни работи на Украина, Емине Дјепар на Фејсбук.

Кишида е првиот шеф на јапонска влада по Втората светска војна кој посетил воена зона. Неговата посета се совпаѓа со престојот на кинескиот претседател Си Ѓинпинг во Москва.

Путин и Си потпишаа два договори за продолжување на нивното стратешко партнерство до 2030 година

Како одговор на пристигнувањето на јапонскиот премиер во Киев, руското Министерство за одбрана соопшти дека два руски стратешки бомбардери летале над Јапонското Море седум часа.

Кишида се среќава со Зеленски за да ја изрази својата „почит кон храброста и истрајноста на луѓето кои ја бранат својата татковина под негова команда, како и непоколебливата поддршка и солидарност на Јапонија и групата Г7“.

Јапонија е исто така домаќин на самитот на Г7 во Хирошима во мај. Земјата континуирано ја поддржува Украина и воведува санкции кон Русија, но не испраќа воена помош бидејќи јапонскиот пацифистички устав ги ограничува воените капацитети на земјата само на самоодбрана.