Курти: Вучиќ бега од потпишување на договорот, кој значи де факто признавање

Курти изјави дека уставноста и законодавството се основните принципи на договорот, како и дека договорот за Заедницата на српските општини е постигнат порано

Косовскиот премиер Албин Курти го обвини српскиот претседател Александар Вучиќ дека „бега од потпишување договор“ со Приштина.

„Бегаа од потпишување на договорот и од анексот на тој договор. Бевме подготвени да потпишеме и во Брисел и овде во Охрид“,

посочи Курти по средбата со Вучиќ во Охрид.

Курти изјави дека уставноста и законодавството се основните принципи на договорот, како и дека договорот за Заедницата на српските општини е постигнат порано.

„Се залагам за правата на сите во Косово и на оние кои имаат сопствен приватен имот на Косово. Ова не е конечен договор, но договорот е прифатен како и денешниот анекс. Претседателот на Србија бега од потпишување на договорот кој значи де факто признавање. Сега имаме анекс како ќе го спроведеме. За нас овој договор е прифатлив, не бегам од потписот“,

рече Курти.

Тој потсети и на проблемот со исчезнатите лица на Косово и Метохија.

„Во Косово се уште има 1 617 исчезнати лица. Претежно има Албанци, но и Срби и луѓе од други националности. Ќе се потрудиме што поскоро да ја дознаеме нивната судбина. Не разговаравме за локални избори, тоа е внатрешно прашање на Косово“,

истакна косовскиот премиер.

Претседателот на Србија, Александар Вучиќ, по средбата во Охрид изјави дека е постигнат некаков договор, дека се договорени неколку точки кои ќе станат дел од преговарачката рамка.

Вучиќ рече дека Европскиот совет на патот, кој е долг, ќе процени колку е направено од планот за имплементација. Ќе се оценува независно за секоја од страните што направила.

Високиот претставник на Европската Унија за надворешни работи и безбедност, Жозеп Борел, по средбата истакна дека Договорот за патот за нормализирање на односите меѓу Косово и Србија е постигнат на 27 февруари, а денеска се разговарало и договарало како тој да се спроведе.

Дијалогот меѓу Белград и Приштина на највисоко ниво продолжи денеска во Охрид под покровителство на Европската Унија, а во фокусот на средбата беше финализирањето на Анексот за имплементација на Договорот за патот за нормализирање на односите меѓу Косово и Србија. Српскиот претседател Александар Вучиќ и косовскиот премиер Албин Курти најпрвин, одвоено, се сретнаа со високиот претставник на ЕУ за надворешни работи и безбедност, Жозеп Борел и специјалниот претставник на ЕУ за дијалог меѓу Белград и Приштина, Мирослав Лајчак, а трилатералната средба започна нешто пред 15:30 часот и заврши околу 22 часот.