Информацијата се заснова на наодите на американската ИТ компанија „Клаудфлер“ (Cloudflare). Извештаите на социјалните мрежи говорат за „интензивни“ прекини и стравувања дека меѓународниот пристап до интернет наскоро може целосно да биде исклучен.
Веќе една недела Иран е потресен од политички немири. Првично, граѓаните во главниот град Техеран протестираа против економската политика на владата, но тие брзо се развија во немири низ целата земја. Покрај слоганите насочени против сегашното раководство, многу демонстранти повикуваат на враќање на монархијата, која беше соборена со Исламската револуција во 1979 година.
За време на протестите во 2009, 2019 и 2022 година, како и за време на израелските воени напади во јуни минатата година, владата строго го ограничи меѓународниот пристап до интернет, а во одредени моменти целосно го исклучуваше. Тогаш беа достапни само националните веб-страници одобрени од властите.
Набљудувачите велат дека ограничувањата имаат две цели. Првата е да се спречи координацијата на демонстрантите за собири, кои во голема мера се организираат преку интернет. Втората е да се спречи објавувањето извештаи, слики и видеа од немирите на социјалните мрежи.
Владата одбива да даде прецизни информации. Сепак, извештаите на социјалните мрежи опишуваат насилни судири меѓу демонстрантите и полицијата и безбедносните сили, во кои наводно се убиени повеќе од десет лица, а многумина се повредени. Активистите за човекови права велат дека се уапсени стотици демонстранти. Овие тврдења не можат независно да се проверат, нагласува ДПА.
Извор: vecer.mk
