Информацијата првично ја соопшти полскиот министер за одбрана Мариуш Блашчак, а неколку часа подоцна потврда дека четирите тенка веќе се испорачани во Украина дојде и од премиерот на Полска, Матеуш Моравјецки, кој во Киев се сретна со украинскиот претседател Володимир Зеленски
Полските власти соопштија дека ѝ ги испорачале првите тенкови „леопард“ на Украина на денот кога се одбележува една година од почетокот на руската агресија врз земјата, пренесува „Гардијан“.
Информацијата првично ја соопшти полскиот министер за одбрана Мариуш Блашчак во својот воведен говор на состанокот на Советот за национална безбедност во Варшава.
„Премиерот не можеше да биде тука, тој замина за Киев да ги однесе тенковите `леопард` кои се прва пратка испорача во Украина“,
рече Блашчак.
Првата пратка „леопарди“ која денеска ѝ е испорачана на Украина брои четири тенка, пренесе Би-би-си.
Неколку часа подоцна потврда дека четирите тенка веќе се испорачани во Украина дојде и од премиерот на Полска, Матеуш Моравјецки, кој во Киев се сретна со украинскиот претседател Володимир Зеленски.
„Полска и Европа се на ваша страна. Дефинитивно нема да ве оставиме, ќе ја поддржуваме Украина сè до целосната победа над Русија“,
рече Моравјецки на заедничката прес-конференција со украинскиот лидер.
Тој истакна дека Полска наскоро ќе обезбеди повеќе тенкови „леопард“, како и голем број модернизирани тенкови Т-72 од советската ера.
Полска ѝ вети на Украина 14 тенка „леопард 2“ од германско производство.
Пред десетина дена Германија, која кон крајот на јануари даде дозвола за извоз и реизвоз на тенковите „леопард“, одлука на која сојузниците меѓу кои и Полска чекаа подолг период, најави дека до крајот на март ќе ѝ испорача на Украина „половина баталјон“ од борбените тенкови, што значи околу 15 тенка.
Тенковите „леопард“ кои се од германско производство се дел од армиите на повеќе од 10 земји членки на НАТО. Украина, според ветувањата што ги доби, треба во наредните месеци да добие најмалку 100 „леопард 1“ – постар, но обновен модел.
Извор: 360stepeni.mk
