Кина го измери земјотресот со јачина од 7,2 степени, додека американскиот геолошки институт и ЕМСЦ објави дека бил со 6,8 степени по Рихтер. Засега нема информации за жртви, а се проверува материјална штета. Во дел од западниот кинески регион Ксинџијанг е запрен и железничкиот сообраќај
Силен земјотрес утрово го погоди Таџикистан, а затресе и дел од Кина.
Земјотрес бил со јачина од 7,2 степени според Рихтеровата со епицентар на околу 82 километри од границата со Кина и со длабочина од 10 километри, објави кинеската државна телевизија „Си-си“ ТВ цитирајќи ги кинеските државни институции.
Геолошкиот институт на САД и Европско-медитеранскиот сеизмолошки центар (ЕМСЦ), пак, објавија дека го регистрирале земјотресот со јачина од 6,8 степени и длабочина од 20 километри.
Во Таџикистан најсилно бил почувствуван во градот Мургоб со оглед дека епицентарот бил на 67 километри од него. Мургоб е главен на град на област во Таџикистан која е ретко населена односно има неколку илјади луѓе.
Засега нема извештаи за жртви.
Во Кина, пак, најсилно бил почувствуван во западниот кинески регион Ксинџијанг каде Одделот за железници повика на итно запирање на патничките возови кои сообраќаат по пругата во јужниот дел на регионот. Локалните власти проверуваат и дали има материјална штета односно дали е нарушена безбедноста на мостовите, тунелите како и на опремата за сообраќајна сигнализација.
Извор: 360stepeni.mk
