Од Министерството за внатрешни работи на Србија соопштија дека е започната акција под оперативното име „Виор“, а по осомничениот е распишана потерница. Утрово нешто по 5 часот специјалните единици почнале со физичко пребарување на теренот, а периодот кога почнува да се разденува им создава проблем при користењето на термалните камери
Осум лица се убиени, а повеќе од 10 се ранети во вооружениот масакр кој синоќа се случи во близина на Младеновац, кога млад маж идентификуван како Урош Б. (21) почнал да пука од автоматско оружје. Осомничениот е сè уште во бегство, а како што јавуваат српските медиумите, околу 600 припадници на специјалните единици на полицијата трагаат по напаѓачот.
Најмладиот убиен во пукањето е роден 2008 година, односно е на возраст од 15 години.
Од Министерството за внатрешни работи на Србија соопштија дека е започната акција под оперативното име „Виор“, а по осомничениот е распишана потерница, пренесува Н1.
Утрово нешто по 5 часот специјалните единици почнале со физичко пребарување на теренот, а периодот кога почнува да се разденува им создава проблем при користењето на термалните камери.
Припадниците на специјалната антитерористичка единица и полициската интервентна бригада пребаруваат викендичка по викендичка во атарот на три села кај Младеновац, јавува РТС.
Напаѓачот Урош Б. најпрвин почнал да пука во селото Дубона, а потоа продолжил со крвавиот пир во Мало Орашје и селото Шепшин.
Таткото на осомничениот, како што неофицијално јавува РТС, бил воено лице.
Две повредени лица на возраст од 21 и 23 години се сместени во Клиничкиот центар „Драгиша Мишовиќ“ и тие се оперирани, но и натаму се наоѓаат во животна опасност.
Во Смедеревската општа болница „Свети Лука“ во текот на ноќта биле примени десет лица, од кои четворица починале, а, три лица се пренесени во Белград, од кои тројца се оперирани и се во стабилна состојба.
Едно лице, како што јавува РТС, има прострелна рана во стомакот без повреди на внатрешни органи, а друго е застрелано во нозете и се наоѓа на одделението за ортопедија, додека трето лице, со повеќе повреди на органите и отворени скршеници се наоѓа во стабилна состојба.
Министерството за здравство на Србија упати апел до граѓаните да даруваат крв, бидејќи се потребни дополнителни крви едници за ранетите во пукањето. Како што наведуваат од Министерството, потребна е крв од сите крвни групи.
Напаѓачот Урош Б. прво почнал да пука во селото Дубона, а потоа во Мало Орачје и Шепшин. Во Дубона тој убил млад полицаец и неговата сестра, пукајќи по случаен избор во училишниот двор, каде ранил уште неколку лица. Според мештаните, напаѓачот бил познат како проблематично лице кој бил од соседното село Долна Дубона.
Министерот за внатрешни работи на Србија, Братислав Гашиќ, пукањето кај Младеновац го оцени како терористички акт, пренесоа српските медиуми.
Дел од нив јавија дека тој е на терен со полицијата и ја следи ситуацијата и интензитетот на потрагата по осомничениот напаѓач.
Поврзани вести:
Извор: 360stepeni.mk
