ГАЗА (АА) – Израелските сили веќе неколку часа изведуваат жестоки воздушни и артилериски напади на подрачјето на Појасот Газа каде се наоѓа и болницата Ал Кудс, известува Анадолу.
Станува збор за болница во која се наоѓаат илјадници ранети и раселени Палестинци од различни делови на Појасот Газа, а локалните извори известуваат дека израелските сили од утринава го бомбардираат подрачјето околу комплексот на здравствената установа.
Во бомбардирањето има загинати и ранети на десетици луѓе, но нема прецизни информации за бројот на жртвите.
На социјалните мрежи се објавуваат снимки кои покажуваат како густ дим се издига на многу места околу болницата
– Во болницата се засолнети 14.00о раселени Палестинци
Нибал Ферсах, еден од официјалните лица на палестинската Црвена полумесечина, на новинарите им потврди дека подрачјето околу болницата Ал Кудс со часови е изложено на израелски воздушни и копнени напади.
Ферсах рече дека во болницата се засолнети илјадници раселени и стотици ранети Палестинци.
„Не знаеме колку лица загинаа или се ранети во денешните напади. Ситуацијата е многу критична. Окупаторските сили извршија многу прекршоци над медицинскиот персонал. Не можеме да молчиме и за оваа ситуација“, рече Ферсах.
Тој информираше дека во болницата се засолнети 14.000 раселени, воглавно деца и жени, и додаде дека со луѓе е исполнет секој дел од болницата, вклучувајќи ги и скалите, ходниците и просториите, освен одделението за интензивна нега и операционите сали.
Ферсах ја повика меѓународната заедница под итно да ги заштити сите болници, здравствени работници и возила на истаната помош кои делуваат во Газа.
– IFRC повика на заштита на болниците
Јаган Чапагаин, генералниот секретар на Меѓународната федерација на друштвата на Црвениот крст и Црвената полумесечина, изрази длабока загриженост поради тешката ситуација околу болницата Ал Кудс во Газа.
Чапагаин на социјалната мрежа Х ги осуди многу интензивните и тешки воздушни и артилериски напади околу болницата.
„Длабоко сум загрижен поради тешката ситуација во близина на болницата Ал Кудс. Поради настанатата ситуација, нашите тимови на Црвената полумесечина не се во можност да укажат прва помош“, рече Чапагаин.
Тој наведе дека болниците се места за помош и засолништа и повика на заштита на таквите места.
