Над 3.000 вработени во институциите од културата останаа без плата на најголемиот христијански празник Велигден. Покрај на социјалните мрежи, револтот ќе го искажат пред ресорното министерство. За вторник закажаа протестен Совет на кој ќе си ги бараат своите работнички права.
–Својот револт ќе го искаже во вторник во 12 часот пред Министерството за култура. Проблемот за платите настана кога требаше да биде усогласена мартовската плата согласно минималната плата според колективниот договор за култура. И како и до сега, изминативе години остануваат спорни 10-те проценти од општиот колективен договор за јавен сектор кои што се спорат само во секторот култура, изјави Вера Атанасовска, претседателка на Синдикатот за култура на РМ.
Од Синдикатот се сомневаат во „игри“ со платите, откако Министерството предложи да ја добијат платата без усогласувањето со минималната, а потоа да се договараат.
Од Министерството за култура соопштија дека вработените ќе добијат плата со потребното зголемување,после празниците.
-Вработените во институциите од областа на културата ќе ги добијат своите плати со потребното зголемување во првите два работни дена следната недела, согласно со Закон и Колективниот договор. Причините за доцнењето е заради усогласување на пресметките за плати со Министерството за финанасии, велат од министерството за култура и туризам.
Од синдикатот најавуваат и правна битка за непочитување на Закон и Колективен договор. А најавуваат и кривични пријави доколку наредната недела не го добијат усогласувањето од 8,5 проценти со минималната плата.
-Ќе бидат поднесени тужби за ненавремена исплата на плати, како и секогаш за задоцнета исплата на плата согласно колективниот договор од 10-ти во месецот, наназад три години со парично побарување. И доколку се исплати платата без усогласувањето со минималната плата ќе се поднесат и кривични пријави за изготвувачите на таква незаконска плата, изјави Вера Атанасовска, претседателка на Синдикатот за култура на РМ.
Над 120.000 вработени во јавниот сектор со мартовската плата требаше да добијат усогласување од 8,5 проценти со минималната плата, и околу 12 проценти зголемување на платите согласно Општиот колективен договор. Владата месецов ги повика Синдикатите на консултации, а зголемувањето од 12% со Општиот колективен договор речиси никој не го доби.
ИЗВОР: ТВ 21
