Поради летните одмори се бележи зголемена фреквенција на возила на Граничниот премин Табановце и на Граничниот премин Пелинце, а времето на чекање на овие премини е околу 45 минути. На останатите гранични премини од македонска страна нема подолги задржувања за влез и излез од државата, информираат од Автомото сојузот на Македонија (АМСМ).
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде постои можност за појава на одрони. Ова посебно важи за делниците Катланово – Велес, Маврово – Дебар – Струга, Виница – Берово и Кочани – Делчево.
Од 1 јули до 31 август на државните патишта во Македонија е воведен летен времен режим на сообраќај со кој е забрането движење на тешки товарни возила со вкупна маса над 15 тони за време на викендите и за денови со екстремно високи температури. Забраната важи во петок од 17:00 до 22:00 часот, сабота од 09:00 до 18:00 часот и недела од 09:00 до 22:00 часот.
Во деновите со екстремно високи температури, определени од Министерството за здравство, забраната важи и од понеделник до четврток во период од 11:00 до 17:00 часот.
Ограничувањето не се однесува на возила кои превезуваат животни, цвеќе, хуманитарна помош, жито и житни култури, леснорасиплива стока, нафта и нафтени деривати, опасни материјали и возила кои вршат превоз за компании што имаат договори за изведување проекти на државните патишта со Јавното претпријатие за државни патишта.
Поради зголемената фреквенција, на возачите им се препорачува да планираат повеќе време за патување и да ги следат информациите за состојбата на патиштата и граничните премини.
ИЗВОР: racin.mk
