Земјотресот во Турција ги омекна и најтврдокорните непријателства: Ерменија ѝ понуди помош на Анкара за справување со катастрофата

Шефот на ерменската дипломатија Арарат Мирзојан, кој е во официјална посета на Берлин, пред новинарите изјавил дека Ерменија е подготвена да испрати хуманитарна помош во производи и спасувачки тимови во двете земји. Тој, сепак, не кажал дали понудите на неговата земја се прифатени

Мирзојан потсетил на разорниот земјотрес што ја погоди Ерменија во 1988 година и дека во тоа време на земјата ѝ била потребна меѓународна помош

Ерменскиот министер за надворешни работи Арарат Мирзојан денеска од Берлин изјави дека неговата земја им понудила помош на Сирија и Турција во нивните напори за справување со последиците од разорниот земјотрес, и покрај тешките, речиси непријателски односи меѓу Ереван и Анкара, јавува Асошиејтед прес.

Мирзојан, кој е во официјална посета на Берлин, како што пренесува новинската агенција, пред новинарите изјавил дека Ерменија е подготвена да испрати хуманитарна помош во производи и спасувачки тимови во двете земји. Тој, сепакм не кажал дали понудите на неговата земја се прифатени.

Шефот на ерменската дипломатија потсетил на разорниот земјотрес што ја погоди Ерменија во 1988 година и дека во тоа време на земјата ѝ била потребна меѓународна помош.

На 7 декември 1988 година Ерменија беше погодена од два последователни земјотреса, кои убија 60 000 луѓе и уништија речиси половина милион згради.

Двата потреси, кои се случија во интервал од една минута, беа со магнитуда од 6,9 и 5,8 степени според Рихтеровата скала и беа почувствувани во Грузија, Турција и Иран.

Во врска со односите меѓу двете земји, на дипломатско ниво тие се непостоечки, а непријателскиот дискурс што владее меѓу двете земји влече историски корени уште од т.н. „геноцид врз Ерменците“ извршен од страна на младотурската влада на Отоманската Империја во периодот на Првата светска војна (1914 – 1918 година). Турција до ден-денеска негира дека станува збор за геноцид тврдејќи, според „Британика“, дека иако се случиле злосторства немало официјална политика на истребување спроведена против ерменскиот народ како група. Друг момент што сериозно ги обременува односите меѓу двете земји е поддршката на Турција за Азербејџан во конфликтот со Ерменија за регионот на Нагорно Карабах.

Инаку, како што потсетува италијанскиот институт за меѓународни политички студии, Турција е првата земја што ја призна независноста на Ерменија по колапсот на Советскиот Сојуз.

Уште еден пример дека природните катастрофи можат да го разбудат хуманиот инстинкт и меѓу традиционални непријатели е испраќањето тим спасувачи и опрема од страна на Грција, која исто така има затегнати односи со соседот Турција, и покрај тоа што двете земји се сојузнички во НАТО.

„Верувам дека зборувам во име на сите мои колеги во грчкиот парламент изразувајќи ја мојата најдлабока тага за многуте жртви на многу силните земјотреси што ја погодија Турција од вчера наутро“,

рекол грчкиот премиер Киријакос Мицотакис денеска обраќајќи им се на пратениците кои ракоплескале кога тој најавил дека се подготвува дополнителна помош.