Зеленски телефонски разговарал со Бајден за случувањата во Русија: Кризата со Вагнер ја откри слабоста на режимот на Путин

„Разговаравме за текот на непријателствата и процесите што се случуваат во Русија. Светот мора да изврши притисок врз Русија додека не се обнови меѓународниот поредок“, рече Зеленски по телефонскиот разговор со претседателот на САД Џо Бајден. Од Белата куќа, исто така, стигна соопштение, во кое се наведува дека двајцата лидери разговарале за тековната контраофанзива на Украина, а претседателот Бајден ја потврдил непоколебливата поддршка на САД

Украинскиот претседател Володимир Зеленски и неговиот министер за одбрана Олексеј Резников изјавија дека вчера одржале серија разговори со лидери на земји сојузнички на Киев на кои било дискутирано за последните случувања во Русија, „слабоста“ на претседателот Владимир Путин и следните чекори во рамките на контраофанзивата на Украина.

Телефонските разговори доаѓаат по бунтот на шефот на руската платеничка група Вагнер Евгениј Пригожин и неговите трупи, што се толкува како неуспешен обид за државен удар во Русија. Бунтот предизвика низа прашања за контролата на Путин на власта додека Украина во истовреме спроведува контраофанзива на југот и истокот на земјата, во обид да ги врати окупраните теротории од Русија, пишува регионалниот сервис на Радио Слободна Европа (РСЕ) повикувајчи се на новинската агенција Ројтерс.

„Разговаравме за текот на непријателствата и процесите што се случуваат во Русија. Светот мора да изврши притисок врз Русија додека не се обнови меѓународниот поредок“,

рече Зеленски по телефонскиот разговор со американскиот претседател Џо Бајден.

Според Белата куќа, двајцата лидери „разговарале за тековната контраофанзива на Украина, а претседателот Бајден ја потврдил непоколебливата поддршка на САД“.

Министерот за одбрана на Украина Олексеј Резников изјави дека тој и неговиот американски колега Лојд Остин разговарале за контраофанзивата на Украина и следните чекори за јакнење на украинските сили.

„Работите се движат во вистинска насока“,

напиша Резников на Твитер.

Иако украинските власти сметаат дека хаосот во Русија оди во корист на Киев, останува да се види дали Зеленски и неговата армија можат да ја искористат конфузијата во Москва за да ги вратат териториите што сега се окупирани од Русија, се дел од коментарите што ги пренесува РСЕ.

Портпаролот на источната воена команда на Украина Серхиј Череватји вчера изјави дека армијата на Киев напреднала 600 метри  до 1 000 во близина на Бахмут, град кој силите на Вагнер го освоија во мај по неколкумесечни борби.

Но, придобивките досега беа постепени, при што Зеленски неодамна рече дека контраофанзивата била „побавна од посакуваното“.

Дополнително, украинскиот претседател Зеленски рече тој и Бајден разговарале за проширување на одбранбената соработка со акцент на оружјето со долг дострел, координација пред самитот на НАТО следниот месец во Вилнус и подготовките за „Глобалниот самит за мир“ што тој го промовираше.

„Вчерашните (во саботата) настани ја открија слабоста на режимот на Путин“, се вели во изјавата на Зеленски.

Од петокот вечерта до саботата вечерта, водачот на групата „Вагнер“, Евгениј Пригожин, чии луѓе се борат заедно со руската регуларна армија во Украина, водеше вооружен бунт на руска територија, чија цел беше да ја собори командата на руската армијата со која беше веќе неколку месеци беше во отворен конфликт.

Сепак, откако во саботата вечерта беше постигнат неочекуван договор меѓу Пригожин и Кремљ, во кој посредуваше белорускиот претседател Александар Лукашенко, лидерот Вагнер објави крај на неговата операција, оставајќи многу прашања неодговорени.

Руското претседателство соопшти дека Пригожин ќе замине од Русија во Белорусија и дека нема да биде кривично гонет, како и неговите луѓе кои го поддржуваа  во акцијата.

Во одделен разговор со канадскиот премиер Џастин Трудо, Зеленски укажа на „заканувачката ситуација“ во огромната украинска нуклеарна централа Запорожје, која беше окупирана од Русија.

Зеленски претходно оваа недела предупреди дека Русија размислува да изврши чин на „тероризам“ кој вклучува ослободување на радијација во електраната, што Русија го негираше.

„Партнерите на Украина мора да покажат принципиелен одговор, особено на самитот на НАТО во Вилнус“,

рече тој.

Украинскиот претседател, давајќи слични коментари, најави и телефонски разговор ос претседателот на Полска Андежеј Дуда.

Во меѓувреме рускиот министер за одбрана Сергеј Шојгу ги посети руските трупи вклучени во воената операција во Украина, јавија денеска руските медиуми, што е негово прво појавување во јавноста по бунтот на паравоената група Вагнер.

Шојгу не го коментирал бунтот на лидерот на Вагнер, Евгениј Пригожин.