Девет лица загинаа во руски напад врз украинскиот град Тернопољ, соопшти украинскиот претседател Володимир Зеленски на својот профил на Телеграм, додавајќи дека во нападот врз Харков биле повредени најмалку 46 луѓе, а дека во ноќта меѓу 18 и 19 ноември Русија лансирала повеќе од 470 борбени дронови и 48 ракети од различни типови врз територијата на Украина.
Според Зеленски, во Тернопољ биле погодени станбени згради и е можно под урнатините да има уште луѓе, пренесува „Укринформ“.
Масовен напад, според украинскиот јавен сервис „Суспилне“, бил извршен и врз Харков, каде што се повредени најмалку 46 лица. Русија, исто така, извела удари врз енергетската инфраструктура во Ивано-Франкивската област, каде што три лица биле повредени, меѓу кои и две деца. Во Лавовската област нападите биле насочени кон критичната инфраструктура и енергетскиот систем.
Повредено е едно лице и во Доњецката област, а удари имало и во Киевската, Николаевската, Черкаската, Черниговската и Днипропетровската област, додаде Зеленски.
„Секој напад врз секојдневниот живот покажува дека притисокот врз Русија не е доволен. Ефикасните санкции и помошта за Украина можат да го променат тоа. Приоритет се ракети за ПВО, дополнителни системи, зајакнување на борбената авијација и производство на дронови за заштита на животите“, истакна Зеленски.
Извор: tv21
