ДАКАР (АА) – Завршија подготовките по повод Рамазан во џамијата Масаликул Џинаан во Дакар, главниот град на Сенегал, која е најголема џамија во Западна Африка, известува Анадолу.
Во џамијата што ја отвори тарикатот (религиозен поредок на суфизмот, концепт за мистичното учење и духовни практики) Муриди во 2019 година, пред Рамазан се исчистени теписите и подот, заменети се звучниците и контролиран е системот за осветлување.
Масаликул Џинаан, што на арапски значи патот до рајот, е најголема џамија во Западна Африка. Како и секоја година, таа ќе биде домаќин на програми за ифтар секој ден во текот на месецот Рамазан.
Илјадници луѓе ќе го прекинат постот истовремено на скромните ифтарски маси што се состојат од сендвичи, кафе, вода и урми. Старешините на тарикатот Муриди ќе приредат ифтарски оброк во џамијата и за муслиманските амбасадори што престојуваат во Дакар.
Џамијата за време на терави намаз во текот на Рамазан се очекува да ја посетуваат од 25.000 до 30.000 луѓе дневно.
– Џамијата Масаликул Џинаан
Џамијата Масаликул Џинаан беше отворена за верски обреди на 27 септември 2019 година, а привлекува внимание со позлатената купола што личи на карпа и со архитектурата и дворот што потсетуваат на Месџид ел-Небеви.
Џамијата, која го добила името по одата „Масаликул Џинаан“ (Патот до рајот) на шеикот Ахмаду Бамба, водач на тарикатот Муриди, државата ја изградила за седум години на површина од 6 хектари во областа Колобане.
Масаликул Џинаан се смета за најголема џамија во Западна Африка. Зградата може да прими вкупно 30.000 луѓе, од кои 10.000 се молат во внатрешниот позлатен дел и 20.000 во дворот поплочен со мермер.
Џамијата го има највисокото минаре во Сенегал, високо 78 метри, а на врвот е поставен часовник. Џамијата има пет минариња, девет куполи, од кои едната личи на карпата во Ерусалим и четири месџиди (место за богослужба).
Извор: Anadolu Agency (AA)
