БРИСЕЛ (АА) – Првата група Сиријци што живеат во Белгија, кои поднеле барање до Министерството за миграција и азил да се вратат во својата земја, заминува денес, јавува Анадолу.
Барт Тиеренс, портпарол на Министерството за миграција и азил, за Анадолу изјави дека првата група Сиријци ќе ја напуштат Белгија денеска и ќе се вратат во својата татковина.
Тиеренс сподели соопштение од министерката за миграција и азил, Никол Де Мур, во врска со ова прашање.
Во соопштението се истакнува зголемениот интерес кај Сиријците кои сакаат да се вратат по падот на режимот на Асад, при што многумина се обратиле до „бирото за доброволно враќање“ на белгиската Федерална агенција за прием на баратели на азил (Федасил).
Наведено е дека 24 лица се пријавени за првата група за враќање.
Мнозинството од првата група што се враќаат во Сирија се сами мажи, жени, но и семејства со деца, се вели во соопштението.
Се нагласува дека минатата година доброволно во својата земја се вратиле двајца Сиријци, поради што моменталната бројка се опишува како „значително зголемување“.
Исто така, се истакнува дека на лицата кои го чекаат исходот од нивните барања за азил, оние кои веќе се стекнале со права за азил или оние кои добиле белгиско државјанство ќе им биде олеснето доколку сакаат да се вратат.
– Барањата за азил од Сиријците сè уште на чекање –
Во соопштението, исто така, се потсетува дека Генералниот комесар за бегалци и лица без државјанство (CGRA) не прифаќа нови барања за азил од Сиријци поради недоволни информации за безбедносната ситуација во Сирија.
Белгија на 9 декември 2024 година објави дека прекинува со примањето барања за азил од Сиријци по падот на режимот на партијата Баас на 8 декември 2024 година.
Сиријците ја сочинуваат најголемата група бегалци во Белгија.
Според податоците од 2023 година, од 12.355 регистрирани баратели на азил во Белгија, 2.682 биле Сиријци.
Извор: Anadolu Agency (AA)
