Премиерот Христијан Мицкоски вели дека е подготвен во новата година да разговара со претставници на Софија за изнаоѓање решение за евроинтегративниот пат. Тој во интервју кажа дека европските челници имаат разбирање за неговите аргументи и идејата за уставни измени со одложена примена, но сепак топката ја префрлаат во Бугарија.
„Немањето Влада, стабилна Влада, фактори на одлучување и сето тоа коешто е таму реалност, го отежнува процесот и тогаш одлуката најчесто е „а бе знаете, Софија не го прифаќа тоа“, изјави премиерот Христијан Мицкоски.
Од друга страна, аналитичарите сметаат дека за време на полското европретседателство, кое започна од први јануари, процесот на проширување со земјите од Западен Балкан нема да биде во фокусот.
„Реформската агенда ќе биде искористена како еден изговор за тоа, меѓутоа, не гледам никакви сигнали од страна на претставниците на Европската Унија или пак на некоја евентуално нова бугарска Влада дека би сакале да излезат во пресрет на барањата на нашата Влада“, изјави Димитар Николовски од „Евротинк’.
Според Николовски, Полска акцентот ќе го стави на соседната Украина.
„Најмногу фокус ќе биде ставен на односите со САД, значи за Трансатлантското партнерство и исто така источното проширување – односите со Украина и со Молдавија, особено поддршка на Украина во нивната војна со Русија“, изјави Димитар Николовски од „Евротинк’.
Инаку, премиерот Мицкоски најави дека кон средината на месецов ќе отпатува за Вашингтон, каде на средбите, меѓу другото, се очекува како тема да се најде и патот на Македонија кон ЕУ.
ИЗВОР: ТВ 21
