ИСТАНБУЛ – Извршниот директор на Мета, Марк Закерберг, истакна дека Илон Маск, сопственикот на X, претходно познат како Твитер, не е сериозен во врска со одржувањето „тепачка во кафез“, пренесува Анадолу.
Во објавата на Тредс, платформа за дигитални социјални медиуми лансирана на 5 јули како конкурент на X, Закерберг рече дека му понудил на Маск „вистински датум“ за борбата.
„Мислам дека сите можеме да се согласиме дека Илон не е сериозен и дека е време да продолжиме понатаму. Понудив вистински датум… Илон не потврдува датум, потоа вели дека му треба операција, а сега наместо тоа бара да има тренинг во мојот двор“, рече тој.
Како одговор, Маск возврати на платформата Х, нарекувајќи го Закерберг „плашливец“.
Маск првично ја изрази својата подготвеност борбата да се одржи колку што е можно поскоро.
Маск го предизвика Закерберг на борба по вестите дека извршниот директор на Мета ќе лансира социјална мрежа слична на Твитер. На 22 јуни Закерберг објави дека ја прифатил понудата за „тепачка во кафез“.
Основачот на Тесла, исто така, изјави дека е во разговори со италијанските власти и тие се договориле за „епска локација“ за борбата чии приходи ќе одат за ветераните и педијатриските болници во Италија.
