Вчерашното убиство во Блаце стана повод и за меѓупартиски обвинувања. Од владејачката СДСМ истакнаа дека министерот за внатрешни работи Панче Тошковски предложен од ВМРО-ДПМНЕ, како и началникот на СВР Скопје, покажале голема некадарност во водењето на Министерството. Од СДСМ прашуваат дали структури блиски на ВМРО се обидуваат да се вмешаат во нелегалните бизниси со дрога.
„ДПМНЕ и Тошковски немаат капацитет да го расчистат случајот. Безбедносна на граѓаните се загрозува поради нивната некадарност. Но, овој случај открива и подлабоки сомневања. Само пред неколку дена обезбедување на Мицкоски тепаше полицаец пред познат скопски локал попречувајќи полициска акција против дрога. Сè уште нема одговори во јавноста која беше улогата на обезбедувањето на Мицкоски во спречувањето на акцијата против дрога?“, вели Дарко Каевски – портпарол на СДСМ.
Од ВМРО-ДПМНЕ пак, велат дека убиството кое се случи вчера е продолжение на крвавата нарко-пресметка меѓу кланови чии убиства започнале во времето кога Оливер Спасовски беше министер за внатрешни работи. Според опозициската партија, срамно е што СДСМ го обвинува Тошковски за овие убиства.
„Таквата сила на тие кланови доаѓа поради фактот што Спасовски, Заев и Ковачевски го ставија МВР на услуга на криминалците, а со помош на нарко-клановите ДУИ и СДС добиваа гласови на неколку последователни изборни циклуси. Застреланиот го нашол братот полицаец чие име се спомнува во структурата на фирмата која продава јаглен на ЕСМ и РЕК Битола. А, јавна тајна е дека ЕСМ и РЕК се златните рудници каде црпи пари врвот на СДС и ДУИ“, велат од ВМРО-ДПМНЕ.
Инаку, по убиството во Блаце кое се случи вчеравечер, од Јавното обвинителство информираа дека се постапува за откривање на сторителите, но и за проверка на евентуална поврзаност на убиството со пожарот во кафе-барот Барон во Чаир. Дел од медиумите веќе информираа дека станува збор за пресметка меѓу нарко-кланови. Лицето кое вчера беше убиено, Зељчиф Туша е инаку татко на Гани Туша, кој е зад решетки поради вмешаност во убиствата во Шиша бар во скопската Чаршија, но и за убиството на двајца наши државјани што се случи летоска на Халкидики.
Лука Андреев
Извор: alsat.mk
