За првпат брод натоварен со храна тргна кон Газа

Бродот на шпанската невладина организација „Отворени раце“ го напушти пристаништето во Ларнака, кое се наоѓа на околу 370 километри од Газа. Тој плови низ хуманитарниот коридор воспоставен од Европската Унија и неколку други земји.

Бродот е натоварен со 200 тони храна која низ Газа ќе ја дистрибуира американската организација World Central Kitchen, чии тимови почнаа да градат пристаниште за истовар. Кипар, најблиската членка на ЕУ до Газа, објави дека подготвува втор, многу поголем товар.

Шефот на европската дипломатија, Жозеп Борел, пред Советот за безбедност на ОН ја осуди употребата на гладта ​​како воено оружје.

„Оваа хуманитарна криза не е природна катастрофа (…) таа е предизвикана од човек“, рече тој.

Повеќе од една недела, арапските и западните земји секојдневно доставуваат помош од воздух и заедно со Европската унија воспоставија поморски коридор до опустошената палестинска територија под израелска опсада.

Бидејќи огромното мнозинство од 2,4 милиони жители на Газа се изложени на ризик од глад, ОН повторуваат дека оваа помош не може да ја замени копнената рута контролирана од израелските власти.

„Треба да има 300 камиони со храна кои влегуваат во Газа секој ден“, рече директорката на Светската програма за храна Синди Мекејн.

„Времето истекува. Гладниот народ на Газа не може повеќе да чека“, рече таа.