Според Мицкоски, од ВМРО-ДПМНЕ се подготвени на брзи парламентарни избори без техничка влада и сега, како што вели тој само тоа е на маса
Лидерот на ВМРО-ДПМНЕ Христијан Мицкоски вели дека е можна нова средба со претседателот на владејачката СДСМ, но само доколку на таа лидерска средба се разговара околу датум за предвремени парламентарни избори и динамиката на законските измени во делот на техничка влада. Според Мицкоски, од ВМРО-ДПМНЕ се подготвени на брзи парламентарни избори без техничка влада и сега, како што вели тој само тоа е на маса.
„Во минатото многу работи ставивме на маса. Пред неколку дена во мојот говор во Кичево споменав дека пред повеќе од една година, буквално се беше на маса. Но, тие ништо не успеаја да направат. Исто така, во овие година дена континуирано, и покрај тоа што никој не не прашуваше кога се правеше тој договор, ние нудевме потенцијални решенија, како што е хрватски модел, одложено дејство. Но, сега нема ништо повеќе на маса, само една работа – лидерска средба околу датумот за предвремени парламентарни избори“,
беше денешниот одговор на Мицкоски на новинарско прашање дали би го продолжиле дијалогот со власта околу уставните измени и дали е можна нова лидерска средба.
Мицкоски рече дека секој оној којшто сака да разговара за ова прашање е добредојден.
„Се останато што се случува во моментот е тортура и притисок кој се случува и во јавноста и ВМРО-ДПМНЕ на тоа ќе се спротистави“,
додаде Мицкоски.
Прашан како ја коментира владината кампања „Ние сме Европа“, Мицкоски одговори дека станува збор за плагијат, за нешто што веќе е видено во Европа, и порача европските дипломати да интервенираат кај Владата да не ја злоупотребуваат Европа.
„Тоа е плагијат. Нема ништо оригинално во Владата на СДСМ и ДУИ. Станува збор за нешто веќе видено во Европа. Најмалку што имаат право овие политички изманици е да се повикуваат на Европа. Се додека се претставуваат како промотори на европските вредности, кредибилетет на Европа во очите на граѓаните ќе опаѓа. Тука и европските дипломати имаат можност да интервенираат кај Владата да не ја злоупотребуваат европа. Владата прави се што е спротивно на европските вредности“,
рече Мицкоски.
ИЗВОР: 360stepeni.mk
