Предлогот за измена на законот за „Бранителите“ може да се изгласа само доколку ги вклучи ветераните на ОНА и семејствата на загинатите во конфликтот во 2001 година, е ставот и на албанската коалиција во Владата, ВРЕДИ и на опозицискиот Европски фронт. Од коалицијата ВРЕДИ велат дека ќе овозможат деблокирање на законот само под еден услов, ист третман на поранешните припадници на ОНА.
-Со 22-годишното владеење, ДУИ, никогаш не се сети вакво нешто да се обезбеди за војниците на ОНА. Ние во владата што ја имаме сега гарантиравме дека законот за бранители нема да помине и стоиме зад она што го кажавме. Ако евентуално има вакво нешто, дефинитивно треба да се приклучат и правата што ќе треба да ги уживаат поранешните војници на ОНА, инаку нема да помине, изјави Дритон Сулејмани од АА/ВРЕДИ.
И од ЕФ велат дека ќе ја поддржат секоја иницијатива која би била сеопфатна. Арбр Адеми од ДУИ за ТВ21 изјави дека ова би било најдобро решение за двете страни.
-Во секој случај, државата не треба да има став за едната страна, нудејќи бенефиции и грижа, а за другата страна да не води сметка. Сметаме дека инклузивен закон во кој ќе бидат опфатени сите страни кои настрадаа од војната, ќе ја има поддршката и од ДУИ и другите партии во Собранието. Мислам дека по 23 години од војната во 2001 година, политичките партии не треба да се водат од дневните политики, изјави Арбр Адеми од ДУИ/ЕФ.
Законот за Бранителите првпат беше одобрен во 2002 година, за сите ветерани и семејства на загинатите од страна на државните полициски и воени сили за време на конфликтот во земјата во 2001 година. Досега овој закон неколкупати претрпе измени и дополнувања, додека последниот предлог поднесен од СДСМ беше блокиран во матичната комисија во Собранието од пратеници Албанци од два блока, власта и опозицијата.
Пратеникот на СДСМ, Фатмир Битиќи, пред неколку дена, говорејќи во Дејли Клик, рече дека се подготвени да седнат и да разговараат, заедно со предложените измени на Законот за Бранителите да се најде решение и за статусот на поранешните војници на ОНА и нивните семејства.
ИЗВОР: ТВ 21
