Волстрит достигна највисоки нивоа во последните пет месеци

Најголем добитник вчера беше акцијата Мета, која порасна за цели 23 отсто, остварувајќи највисок дневен раст од 2013 година

На Волстрит во четвртокот, S&P 500 и Nasdaq индексот ги достигнаа своите највисоки нивоа во речиси пет месеци, благодарение на смирувачките пораки од претседателот на ФЕД Џером Пауел за натамошно заострување на монетарната политика.

Индексот S&P 500 во четвртокот порасна за 1,47 отсто, на 4 179 поени, а индексот Nasdaq за 3,25 отсто, на 12 200 поени.

И додека тие два индекса достигнаа највисоки нивоа за речиси пет месеци, индексот Dow Jones ослабна за 0,11 отсто, на 34 053 поени, најмногу под притисок на падот на цените на акциите во фармацевтскиот сектор.

Инвеститорите сè уште ја одмеруваат одлуката на ФЕД во средата да ја зголеми основната каматна стапка осми пат по ред, за 0,25 процентни поени, на опсег од 4,50 до 4,75 отсто, што е ново највисоко ниво од 2007 година, како и изјавата на Пауел дека напредокот е постигнат во борбата против инфлацијата.

Најголем добитник вчера беше акцијата Мета, која порасна за цели 23 отсто, остварувајќи највисок дневен раст од 2013 година, на крилата на подобриот од очекуваниот приход во последниот квартал и најавата за откуп на акции во вредност од 40 милијарди долари. .

Цените на другите големи технолошки компании исто така пораснаа благодарение на тие резултати, при што акциите на Алфабет пораснаа за 7,3 отсто, Амазон 7,4 отсто и Епл за 3,7 отсто.

Технолошките акции се покажаа значително подобри од почетокот на оваа година отколку минатата година, благодарение на ублажувањето на инфлацијата што ги натера инвеститорите да очекуваат ФЕД наскоро да ја прекине својата агресивна кампања за зголемување на каматните стапки.

Секторот за информатичка технологија S&P 500 е во пораст за повеќе од 14 проценти од почетокот на годината, откако минатата година падна за повеќе од 28 проценти.

Од друга страна, акциите на фармацевтските компании во четвртокот имаа нешто полошо остварување, најмногу под притисок на падот на цената на акциите на Мерк за 3,3 отсто поради послабата од очекуваната прогноза за овогодинешната заработка.

Најважните индекси силно пораснаа и на европските берзи, откако Европската централна банка и Банката на Англија ги зголемија каматните стапки за очекуваните 0,5 процентни поени.

Паневропскиот индекс Stoxx 6000 се зголеми за 1,35 отсто во четвртокот. Истовремено, германскиот DAX скокна за 2,16 отсто, на 15 509 поени, париски CAC за 1,26 отсто, на 7 166 поени, а лондонски FTSE за 0,76 отсто, на 7 820 поени.