Војна во Газа: Децата во Хан Јунис наставата ја следат на локалните гробишта

ГАЗА (АА) 

Учителите и учителките во Газа и покрај многу тешките воени услови, и понатака на различни начини се обидуваат да изведуваат настава за да можат учениците барем донекаде да го продолжат своето образование и учење, известува Анадолу.

Палестинските учителки во Хан Јунис се обидуваат, онолку колку што тоа го дозволуваат околностите, да им пренесат знаење на децата во мала и трошна зграда на локалните гробишта бидејќи не успеале да најдат побезбедно и посоодветно место за предавање.

И покрај многу ограничените и тешки услови во Газа, учителите сакаат нивните ученици да не бидат лишени од образование, со надеж дека еден ден повторно ќе следат настава во обновените училишта кои беа уништени во израелските напади.

– Настава на гробишта

Многу деца често доаѓаат на локалните гробишта со нивниот учител и одржуваат настава, практично покрај гробовите.

Раселените семејства во Хан Јунис побараа засолниште во близина на гробиштата, па нивните деца продолжуваат барем со некаков облик на школување со помош на наставници-волонтери во многу тешки услови.

И покрај тоа што ситуацијата во Газа е многу тешка и опасна затоа што израелската армија секојдневно извршува напади, учениците доаѓаат на часови со ранци, обидувајќи се барем малку да заборават на ужасите на војната.

Многу често, придружувани од учителките, пеат песни и играат игри со надеж дека еден ден ќе можат повторно да дојдат во ново училиште без страв од израелски напади.

Повеќе од 650.000 палестински деца пропуштаат уште една година на образование, истовремено соочувајќи се со трауми, глад и губење на најблиските.

– Војна за геноцид

Во октомври 2023 година, Израел започна геноцидна војна во Појасот Газа, во која досега се убиени повеќе од 44.800 Палестинци, главно жени и деца.

На 21 ноември, Меѓународниот кривичен суд издаде налози за приведување на израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото во Газа.

Израел е обвинет за геноцид пред Меѓународниот суд на правдата поради војната во Појасот Газа.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.