Во Србија повторно протече амонијак, 10 лица префрлени во болница во Панчево

Полицијата и пожарникарите ги евакуирале сите граѓани кои живеат во близина и го обезбедиле местото

Во населбата Топола кај јужната индустриска зона во Панчево, Србија, синоќа околу 23 часот дошло до протекување на амонијак од цистерна, а 10 лица со полесни повреди се пренесени во Општата болница Панчево. Од нив, двајца се на кислородна поддршка, пренесуваат српските медиуми.

Останатите имале полесни проблеми со горните дишни патишта, а никој засега немал симптоми на труење.

Веднаш по инцидентот, полицијата и пожарникарите ги евакуирале сите граѓани кои живеат во близина и го обезбедиле местото.

Агенцијата Танјуг јавува дека протекувањето се случило на паркинг на една од фирмите во тој дел од градот, каде била паркирана цистерната.

Интервенцијата на полицијата и пожарникарите на местото на инцидентот е завршена, но противпожарни екипи и понатаму дежураат на местото за да се следи состојбата.

Кон крајот на декември 2022, пак, исто така имаше големо истекување на амонијак во Србија. Тогаш товарен вагон се преврте во близина на селото Станичењ кај Пирот, поради што беше прогласена и вонредна состојба, а над 50 лица завршија во болница со симптоми на труење.