Во Музејот на современа уметност- Скопје денеска ќе се одржи Дигитален самит на Западен Балкан (WBDS) 2025 на кој ќе присуствува и ќе се обрати премиерот Христијан Мицкоски. Oбраќањa ќе имаат и министерот за дигитална трансформација Стефан Андоновски и генералниот секретар на Советот за регионална соработка (RCC) Амер Капетановиќ.
По нивното обраќање ќе следи официјалното отворање на главната програма, каде што фокусот ќе биде ставен на три приоритетни теми за дигиталната иднина на регионот: Дигитален паричник – безбеден пристап до јавни и приватни услуги; Интероперабилност – технолошка поврзаност меѓу системите во регионот; Сајбер безбедност – заштита на податоци и критична дигитална инфраструктура.
Дигиталниот самит е регионален настан кој ги обединува носителите на дигиталната трансформација од Западен Балкан, Европската Унија и пошироко. Самитот се организира од страна на Министерството за дигитална трансформација и Советот за регионална соработка (RCC).
На настанот се очекува присуство на над 800 учесници, меѓу кои високи владини претставници, експерти, компании, академски институции и меѓународни партнери. WBDS 2025 ќе биде платформа за нови иницијативи, вклучително и дискусии за намалување на роаминг трошоците со ЕУ, во насока на воспоставување на модел „роаминг како дома“ помеѓу регионот и Унијата.
Извор: kurir.mk
