Фудбалерите на АИК и Бромапојкарна одиграа натпревар за паметење во шведскиот фудбал, во кој беа постигнати дури 11 гола во второто полувреме. Гостите на крајот славеа со неверојатни 5-6, иако во финишот од мечот за малку ќе останеа без победа по неверојатниот камбек на домаќините.
Вистинската голеада започна по паузата. Бромапојкарна поведе во 48-та минута, АИК брзо возврати, но потоа гостинскиот тим целосно ја презеде контролата и постигна уште четири гола. Во 70-та минута резултатот беше 1-5 и се чинеше дека победникот е решен.
Сепак, АИК не се предаде. Домашните фудбалери тргнаа во офанзива и почнаа да ја топат високата негатива, постигнувајќи три гола во последните 20 минути од регуларниот дел. Драмата кулминираше во судиското надополнување, кога во 98-тата минута АИК успеа да израмни на 5-5, предизвикувајќи ерупција на воодушевување на трибините.
Но, кога се чинеше дека домашниот тим направил подвиг за паметење и спасил барем еден бод, следуваше нов шок. Само една минута подоцна, во 99-тата минута, Бромапојкарна го постигна шестиот гол и ја запечати победата од 5-6.
Така, АИК по неверојатниот камбек остана со празни раце, а гостите си заминаа со трите бода по натпревар кој понуди неверојатни пресврти и драма до последниот момент.
Извор: sportmanija.mk
