ДАКАР (АА) – Во Нигер се организираат доброволни милициски сили составени од цивили како одговор на потенцијалната воена интервенција на Економската заедница на западноафриканските држави (ЕКОВАС) по државниот удар кон крајот на минатиот месец, јавуваат медиумите, пренесува Анадолу.
Регрутирањето за цивилните милициски сили наречени Волонтери за одбрана на Нигер ќе започне денес во националниот главен град Нијамеј.
Волонтерите заинтересирани за приклучување во милициските сили ќе се соберат на стадионот „Генерал Сејни Кунче“ каде што ќе може да се регистрира секој постар од 18 години.
Слични активности се организираат и долж границите на Нигерија и Бенин.
Милициите ќе ѝ помагаат на војската како за вооружена борба, така и за медицинска нега, логистика, техничка и инженерска поддршка кога ќе биде потребно на воената администрација.
Слична милициска група со исто име постои во Буркина Фасо, која ѝ дава поддршка на армијата во напорите за борба против тероризмот.
За време на состанокот во Гана, началниците на Генералштабот на ЕКОВАС објавија дека е договорен датум за воена интервенција во Нигер.
ЕКОВАС соопшти дека нејзините војници се подготвени да интервенираат веднаш штом ќе бидат дадени наредби, но конкретниот датум на операцијата не е откриен.
Генералот Абдурахаман Тчиани, поранешниот командант на претседателската гарда на Нигер, минатиот месец се прогласи за шеф на преодната влада, откако претседателот Мухамед Базум беше соборен од власт со воен удар.
Извор: www.aa.com.tr
