ГАЗА (АА) – Во напад на израелската војска во близина на болница во градот Рафа во јужниот дел на Појасот Газа, загинаа 11 лица, меѓу кои двајца медицински работници, додека 50 лица се повредени, јавува Анадолу.
Министерството за здравство во Газа соопшти дека израелската војска извршила воздушен напад врз шаторите во кои се сместени раселените Палестинци во непосредна близина на влезот во породилиштето во болницата во подрачјето на Тел ес Султан.
Во нападот загинати се 11 лица, меѓу кои и вработените во брзата помош Абдулфетах Ебу Мери и Салим Џума Шераб.
Во градот Рафа пред израелските напади живееја помалку од 330.000 жители, а сега има околу 1,5 милиони Палестинци кои пристигнаа бегајќи од израелските напади во областа.
Израел започна смртоносна офанзива во Појасот Газа откако на 7 октомври Хамас изврши напад во Израел.
Досега во израелските напади врз Појасот загинаа најмалку 30.320 луѓе.
Израел, исто така, наметна остра блокада врз Појасот Газа, оставајќи го неговото население, особено жителите на северна Газа, на работ на глад.
По тужбата за геноцид поднесена од Јужноафриканската Република, на 26 јануари Меѓународниот суд на правдата пресуди дека Израел мора да се воздржи од какви било дејства поврзани со убиства, напади и уништување на жителите на Појасот Газа и да ги преземе сите мерки за да спречи геноцид.
Извор: Anadolu Agency (AA)
