Во израелските напади во Газа загинаа уште 26 Палестинци, билансот достигна 34.622

АНКАРА (АА) – Најмалку уште 26 Палестинци загинаа, а 51 се повредени во изминатите 24 часа во израелските напади врз опколениот Појас Газа, соопшти денес Министерството за здравство во Газа, јавува Анадолу.

„Израелската окупација (сили) во изминатите 24 часа изврши три масакри врз семејства во Појасот Газа, оставајќи 26 загинати и 51 повреден“, истакна Министерството.

„Многу тела сè уште се наоѓаат под урнатините и на патиштата бидејќи спасувачите не можат да дојдат до нив“, се додава.

Непочитувајќи ја привремената пресуда на Меѓународниот суд на правдата, Израел продолжува со нападот врз Појасот Газа каде што од 7 октомври досега загинати се вкупно 34.622 Палестинци, главно жени и деца, а 77.867 се повредени, според палестинските здравствени власти.

Израел започна воена офанзива врз Појасот Газа по прекуграничниот напад на Хамас, во кој Тел Авив вели дека загинале речиси 1.200 лица.

Израел е обвинет за геноцид пред Меѓународниот суд на правдата. Привремената пресуда во јануари му нареди на Тел Авив да ги запре геноцидните акти и да преземе мерки за хуманитарната помош да стигне до цивилите во Газа.

Меѓутоа, нападите продолжуваат со несмалено темпо, а испораките на помош и понатаму се недоволни за решавање на хуманитарната катастрофа.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.