ГАЗА (АА) – Најмалку 18 Палестинци се убиени во нападите што ги изврши Израел околу болницата „Камал Адван“ во градот Беит Лахија, северно од Појасот Газа, јавува Анадолу.
Според информациите добиени од очевидци, израелските воени авиони ги гаѓале куќите на семејствата Шабан, Авад, Ешкар и Јасин во северниот дел од Појасот Газа.
Во нападите се убиени 18 Палестинци, а во тек се потрагата и спасувањето на оние што останале под урнатините.
Неколку часа по утринскиот напад на болницата „Камал Адван“, израелската армија се повлече и жестоко го бомбардираше подрачјето околу неа.
Израелската армија насилно ги истера пациентите и медицинскиот персонал од болницата и во текот на рацијата приведе многу пациенти и здравствени работници.
Пред нападот, израелски воени возила беа стационирани околу болницата и ја опколија од сите страни.
Здравствени извори објавија дека станицата за кислород во болницата „Камал Адван“ во северниот дел на Појасот Газа, каде што израелската армија врши интензивни напади од почетокот на октомври, целосно престанала да работи, поради што во ризик се животите на болните и повредени.
Изворите велат дека израелски беспилотни летала извршиле интензивни напади околу болницата и дека поради тоа не било можно да се поправи станицата.
Извор: Anadolu Agency (AA)
